दोलखा, सम्वाददाता । स्वस्थानी व्रतकथाको अन्तिम दिन दिन दोलखा बजारमा देखाइने मल्लकालीन सहस्र जलयात्रा धुमधामका साथ मनाइएको छ । धार्मिक मान्यता अनुसार सतीदेवीको घुँडा पतन भएको वारणसीबाट बाजागाजा र भजनकीर्तनका साथ कन्या केटाले जल बोकी जात्रा प्रारम्भ हुन्छ ।

• 

मल्लकालदेखि सुरु भएको स्वस्थानीको जलयात्रामा व्रत लिनेहरुले जल चढाएर व्रत अन्त्य गर्ने प्रचलन दोलखामा छ । दोलखाकै पूरानो जात्राका रुपमा मनाइने सहस्र जलयात्रालाई पौराणिक जात्रा समेत भन्ने गरिन्छ ।

दोलखा बजारको वाराणसीमा विहान नुहाई धुवाईपछि मूर्तिलगायत ध्वजापतासहित सजिएका कन्या केटाले कलशमा सहस्र जल र मूर्ति बोक्नेहरु त्रिपूरा सुन्दरी मन्दिरबाट दोलखा बजार परिक्रमा गरी भीमेश्वर मन्दिरमा आएर जात्रा समापन हुन्छ ।

• 

• 

• 

जात्रा शुरु भएपछि दोलखाका टोल डबलीमा स्वस्थानीको व्रत लिनेहरु घर–घरबाट चोखो पानी लिएर चढाउन जम्मा हुने गर्छन् । मूर्ति बोक्ने नारायणहरु र सहस्र जल बोक्नेलाई दोलखा बजारको विभिन्न टोल र डबलीमा पूजा सामग्री लिएर उभिएका महिला व्रतालुहरुले दर्शन गर्ने घर–घरबाट ल्याएको चोखो जल चढाउने गर्छन् ।

वारणसीमाबाट शुरु भएको जलयात्रा जात्रामा ढोलक, सनाई र झम्टा बजाउने समूह हुन्छन् भने भजनकीर्तन गर्ने दुई समूह अघि पछि हुन्छन् । दोलखा बजारमा स्वस्थानी वाचन हुने दिनदेखि दिनहुँ भजनकीर्तन गर्दै बजार परिक्रमा गर्ने गरिन्छ । सहस्र जलयात्रा जात्रामा महिना दिनदेखि स्वस्थानीको व्रत बस्नेहरुले आज जात्रामा जल चढाएर प्रसाद खाएपछि व्रत सकिने परम्परा छ ।