दोलखा भीमेश्वर मन्दिर भदौ २८ गते देखि सम्पूर्ण दर्शनार्थीहरुका लागि खुल्ला गरिने
shares
महेन्द्र श्रेष्ठ, दोलखा । दोलखा भीमेश्वर मन्दिर भदौ २८ गते देखि सम्पूर्ण दर्शनार्थीहरुका लागि खुल्ला गरिने भएको छ । कोरोना संक्रमणको जोखिमका कारण लामो समयदेखि बन्द रहेका दोलखा भीमेश्वरको मन्दिर सोमबारदेखि दर्शनार्थीका लागि खुला गरिने भएको हो।
जिल्लामा शैक्षिक संस्थामा भौतिक उपस्थितिमा पठन पाठनका क्रियाकलाप तथा राजनितिक सभा सम्मेलन भईरहेको अवस्थामा धार्मिकस्थल बन्द गर्नु उचित नदेखिएको दर्शनार्थीको गुनासोको आधारमा मन्दिर खोल्न अनौपचारिक सहमति दिईएको प्रमुख जिल्ला अधिकारी वासुदेव घिमिरेले जानकारी दिनुभयो । धार्मिकस्थल खुलेसँगै पर्यटकहरुको आवागमनले दोलखाको आर्थिक गतिविधिमा सहयोग पुग्ने प्रमुख जिल्ला अधिकारी घिमिरेको भनाई छ ।
स्थानीय प्रशासनले अनुमति दिएपछि भाद्र २८ गते सोमबारदेखि सम्पूर्ण दर्शनार्थीको लागि मन्दिर खुला गरिएको भीमेश्वर गुठी तथा पूजा व्यवस्थापन समितिका अध्यक्ष भरत श्रेष्ठले जानकारी दिनुभयो ।
आईतबारदेखि जिल्लाका सबै शैक्षिक संस्थाहरुमा भौतिक उपस्थितिमा कक्षा सञ्चालन शुरु भएको छ भने पछिल्ला दिनहरुमा ठूलो संख्यामा मानिसहरुको जमघटसहित राजनितिक सभा सम्मेलन भईरहेका छन् ।
धार्मिकस्थलहरुमा हुने भिडभाडका कारण कोरोना संक्रमण जोखिम बढेपछि जिल्लाका धेरैजसो मठ मन्दिर गत बैशाख महिनादेखि बन्द रहेको थियो ।
वि.सं.२०७८ भदौ २८ सोमवार १८:४३