ट्रेन्डिङ

काठमाडौं । चीनमा कोभिड–१९ को बढ्दो संक्रमणका लागि जिम्मेवार कोरोना भाइरसको ओमिक्रोन उप–स्वरुप बीएफ.७ को तीन जना संक्रमित भारतमा पनि भेटिएका छन् । भारतमा भेटिएको त्यहि भेरिएन्ट हो, जसले चीनमा अहिले महामारीको रुप लिएको छ । यसैबीच भारतको स्वास्थ्य मन्त्रालयले पनि मानिसलाई सर्तक रहनका लागि अपिल गरेको छ ।

गुजरातको जैव प्रौद्योगिकी अनुसन्धान केन्द्रले भारतमा बीएफ.७ को पहिलो संक्रमित फेला पारेको हो । अहिलेसम्म गुजरातमा दुई जना संक्रमित भेटिएका छन् भने उडिशाबाट एक जना ।

भारतको केन्द्रिय स्वास्थ्य मन्त्री मनसुख मान्डभियाको अध्यक्षतमा बुधवार भएको कोभिड–१९ को समीक्षा बैठकमा एक जना विशेषज्ञले अहिलेसम्म कोभिड संक्रमितको संख्यामा समग्र वृद्धि भएको छैन तर अहिले बढ्दो स्वरुपलाई हेर्दा निरन्तर निगरानी गर्नु आवश्यक भएको बताएका छन् ।

भारतमा कोरोनाको सब भेरिएन्ट बीएफ.७ संक्रमित भेटिएपछि नेपालमा पनि यो भेरिएन्ट भेटिन सक्ने सम्भावना धेरै रहेको छ ।

खुल्ला सीमानाका कारण पहिला पनि भारतमा नयाँ भेरिएन्ट भेटिँदा त्यसको केहि समयपछि नै नेपालमा पनि उक्त भेरिएन्टका संक्रमित भेटिएको धेरै उदाहरण छन् । यदि चीनमा जस्तै भारतमा पनि यो भेरिएन्टले महामारीको रुप लियो भने त्यसको असर नेपालमा देखिन समय लाग्दैन ।

त्यसैले अहिलेदेखि नै खुल्ला सीमा नाकामा कोभिडका लागि बनाइएका मापदण्ड अपनाउनु पर्ने देखिन थालेको छ । २०१९ मा पहिलो पटक चीनमा देखिएको कोभिड– १९ को असर अहिले पनि हरेक क्षेत्र, बजार र व्यवसायमा रहिरहेकाले यसप्रति छिट्टै सोच्नु आवश्यक रहेको छ ।

चीनका विभिन्न शहरहरुमा वर्तमान कोभिडको अत्यधिक संक्रामक स्वरुप ओमिक्रोन, विशेष गरेर बीएफ.७ को चपेटामा रहेका छन्, जुन बेइजिङमा फैलिरहेको मुख्य स्वरुप हो । यहि भेरिएन्टका कारण चीनमा कोभिड संक्रमितको संख्या तिव्र गतिमा बढेको हो ।

बीएफ.७ ओमिक्रोनको स्वरुप बीए.५को उपस्वरुप हो र यसमा संक्रमणको व्यापक क्षमता हुन्छ । यसका साथै इनक्यूबेशन अवधि कम हुन्छ र यसमा पुनः संक्रमण उत्पन गराउने अथवा खोप लगाइसकेका व्यक्तिलाई पनि संक्रमित बनाउन सक्छ । यो भेरिएन्ट अमेरिका, ब्रिटेन, बेल्जियम, जर्मनी,फ्रान्स र डेनमार्क जस्ता यूरोपीय देश सहित विभिन्न देशमा पहिला पनि भेटिसकेको छ ।