काठमाडौँ  । नेकपा एमालेको स्थायी कमिटी बैठक रोक्न माधव नेपाल पक्षका नेताहरूले आग्रह गरेका छन् । आन्तरिक विवाद समाधान गर्न गठित माधव नेपाल समूहका कार्यदलका सदस्यहरूले च्यासलस्थित बैठकस्थलमै पुगेर जारी स्थायी कमिटी बैठक रोक्न माग गरेका हुन् ।

कार्यदलका संयोजक भीम रावललगायतका नेताहरुले बैठकमै पुगेर ओलीसँग एमाले एकताका लागि एकलौटी बैठक गर्न नहुने भन्दै बैठक रोकेर सहमतिका लागि अघि बढ्न आग्रह गरेका थिए ।

अहिले एमालेको एकता आवश्यक छ । देश र जनताका लागि एकता गर्नु अपरिहार्य छ’ सोही आग्रह गरेर बाहिरिएपछि रावलले पत्रकारहरुसँग भने, ‘त्यसैका लागि अध्यक्ष ओलीसँग बैठक रोक्न माग गरेका हौँ ।’

तर जवाफमा ओलीले बैठकमा सहभागि भएपछि बस्‍न भनेको र बैठक जारी रहने बताएको रावलले बताए । बैठक रोक्न नमानेपछि आफूहरु बैठकस्थलबाट बाहिरिएको पनि रावलले बताए ।

बैठकमा रावलका साथै कार्यदलका सदस्य सुरेन्द्र पाण्डे, गोकर्ण बिष्ट र घनश्याम भुसाल पनि पुगेका थिए । तर उनीहरु अहिले बैठकस्थलबाट बाहिरिएका छन् ।